ACCIÓNS FORMATIVAS DA GARDA CIVIL CONTRA OS INCENDIOS FORESTAIS
Coidar o medio ambiente é cousa de todos, e é importante que os máis novos saiban desde moi pequenos a importancia que ten respectar a natureza. Por este motivo, persoal da Garda Civil, formado especificamente para impartir charlas informativas, desprazarase ata os centros que participan en Voz Natura, para falar aos alumnos sobre o labor que levan a cabo desde o Servizo de Protección da Natureza (Seprona) e da necesidade de respectar e coidar a contorna que os rodea.
CURSO DE FORMACIÓN PARA DOCENTES: “DESENVOLVEMENTO E DIVULGACIÓN DE PROXECTOS AMBIENTAIS”
Voz Natura pon en marcha un novo curso para profesores, no que os docentes serán formados en cuestións relacionadas co desenvolvemento e divulgación de proxectos educativos ambientais. As clases impartiranse os días 15, 16, 22 e 23 de novembro en Vigo, e serán totalmente gratuítas e homologables pola Consellería de Educación.
VISITAS GUIADAS AO MUNCYT DE A CORUÑA
A caixa de cristal da ciencia volve abrirse para recibir as visitas dos centros que participan este curso en Voz Natura. A Fundación Santiago Rey Fernández-Latorre subscribiu un novo acordo coa Fundación Española para a Ciencia e a Tecnoloxía, o que permitirá que por sexto ano os alumnos poidan participar nas visitas guiadas ao Museo Nacional de Ciencia e Tecnoloxía (Muncyt) da Coruña.