Décimo cuarta edición (2010-2011)

«Un colexio pequeno en tamaño pero grande en compromiso co seu medio ambiente próximo». Así define o comité científico de Voz Natura ao colexio Xesús Ferro Couselo (Valga) e, por iso e por moitos outros motivos, seleccionouno como gañador do Premio Galicia deste curso. Os expertos do programa tomaron esta difícil decisión tras inspeccionar en primeira persoa e revisar as memorias dos 272 traballos realizados nesta 14ª edición. Xunto a este, fallaron catro premios provinciais e un ao mellor traballo infantil. 

O fallo do xurado foi o siguente: 

Premio Galicia: CEP Xesús Ferro Couselo (Valga-Pontevedra) 

Premio Provincia da Coruña: CEIP Vilarmide (Muxía) 

Premio provincia de Lugo: CEIP Cervantes 

Premio Provincia de Ourense: CPR Pablo VIN - Fátima (A Rúa de Valdeorras) 

Premio provincia de Pontevedra: IES Faro das Lúas (Vilanova de Arousa) 

Premio ao mellor proxecto infantil: Rede de Escolas Infantís Cativos (11 centros en Galicia)

Premio Galicia 

No caso dos gañadores do premio Galicia, o comité destaca que «souberon compensar a limitación de medios con grandes doses de rigor e dedicación». Os cen alumnos do centro e todo o profesorado traballaron sobre auga, ciencia, etnografía, reforestación, limpeza de ecosistemas, hortos, xardíns, enerxías alternativas e actividades de concienciación. 

Aínda por riba, aínda tiveron tempo para darlle un enfoque solidario ao traballo. A través de distintas iniciativas, recadaron fondos para construír un pozo de auga no campamento saharauí de Dajla. De alí precisamente chegan cada verán a Valga os nenos que participan no programa Vacacións en Paz, para pasar esta época afastados da calor do deserto. 

Outro dos compoñentes que valorou o comité á hora de adxudicar o premio foi a capacidade da comunidade escolar para involucrar nas súas accións ás súas familias, veciños e ás autoridades municipais.Como recompensa ao seu traballo, os alumnos do Ferro Couselo gozarán de tres días de actividades en Pena Aventura Park, en Ribeira de Pena (Portugal), cunha visita ao parque nacional Peneda-Gerês. 

Premios provinciais 

Premio Provincia da Coruña: CEIP Vilarmide (Muxía). «Nós mollámonos coa auga». Cunha longa traxectoria en Voz Natura, a comunidade educativa de Vilarmide limpou ríos, realizou plantacións en montes e participou activamente na protección de espazos naturais, promovendo o coidado da fauna -con xornadas especiais centradas no lobo- e a flora. Ademais, realizaron actividades de concienciación sobre o aforro de auga e organizaron, un ano máis, o seu tradicional e completísima exposición micolóxica. 

Premio provincia de Lugo: CEIP Cervantes. «Cada pinga un tesouro». Co tema central da edición -a auga- moi presente, o colexio Cervantes apostou pola súa vertente máis solidaria recadando fondos para construír un pozo de auga potable en Etiopía. Tamén limparon a praia dos Castros, en Ribadeo, reforestaron e coidaron contornas naturais de gran sensibilidade. Para dar a coñecer a súa actividade, a comunidade educativa mantén un interesante blog Voz Natura: http://blogs.voznatura.é/cprcervantes/ 

Premio Provincia de Ourense: CPR Pablo VIN - Fátima (A Rúa de Valdeorras) «Pinga de auga viva». A xuízo do comité científico, o proxecto do colexio Pablo VI - Fátima responde perfectamente á proposta de Voz Natura sobre a auga, con múltiples actividades. Pero, ademais, non descoida outros campos como as reforestacións, os estudos etnográficos e un amplo traballo de reutilización e reciclaxe co que os alumnos e profesores máis directamente implicados contaxiaron o seu entusiasmo ambiental a toda a comunidade educativa. 

Premio provincia de Pontevedra: IES Faro das Lúas (Vilanova de Arousa). «Ecosistemas acuáticos en Vilanova». Ademais de limpar a súa costa e as súas praias, os alumnos deste instituto de Vilanova de Arousa combinaron tres perspectivas para o estudo e preservación dos ecosistemas acuáticos da súa contorna. Realizaron actividades de investigación científica sobre o terreo; estudaron a problemática dos seus ríos e analizaron as actividades que lles afectan como a pesca, as verteduras, os xurros e os lixiviados de pozos negros. 

Os gañadores provinciais, pasarán dúas xornadas en Asturias, con actividades nun parque de aventura e unha ruta polos Lagos de Covadonga nos Picos de Europa. 

Premio ao mellor proxecto infantil: Rede de Escolas Infantís Cativos (11 centros en Galicia). Neste caso valería o tópico. E é que o premio ao mellor proxecto infantil caeu moi repartido porque, tocou en tres das catro provincias, A Coruña, Lugo e Pontevedra. As gañadoras foron a Rede de Escolas Infantís Cativos, con once centros en Galicia e dezaseis noutras comunidades. O proxecto premiado titúlase «Cativos no planeta azul» e abarca traballos con gran valor educativo sobre a auga, reforestacións nos ecosistemas próximos aos centros e outras accións relacionadas coa protección de contornas naturais. Do mesmo xeito que no caso do Premio Galicia, este galardón tamén recoñece a gran implicacións das familias e as institucións nas iniciativas abanderadas polos pequenos. A participación foi moi importante, con 713 nenos. Así, as celebracións chegan ás escolas de Cativos en Santiago, Oroso (A Ulloa), Teo (Calo), Vedra, Ferrol (Grumete), Mugardos (As Lagoas), Ribeira (hospital de Barbanza), A Guarda, Pontecesures, Vilagarcía (hospital do Salnés) e Vilalba. 

A entrega de premios ser realizará na festa fin de curso, o vindeiro sábado 4 de xuño. Máis información