Dedicados a Voz Natura en secundaria e bacharelato
Algúns deles creceron participando no programa e outros se incorporaron nos últimos cursos. Agora, xa a piques de cambiar o instituto pola universidade, desenvolven o seu último traballo Voz Natura. Os maiores do programa teñen máis capacidade para executar accións de recuperación ambiental e ademais poñen o toque máis científico e especializado entre todos os proxectos ambientais que se están executando este curso.
Os alumnos de secundaria e bacharelato que forman parte de equipos Voz Natura superan os 7.000. Participan a través de colexios que inclúen estes niveis educativos ou de institutos. Un caso especial é o do colectivo Lapis Verdes que agrupa a dezaseis centros educativos da comarca de Ferrolterra, a maioría deles institutos. Entre todos están a recuperar unha zona abandonada que xa converteron nun espazo de recreo para os veciños.
En Vigo, estréase este curso o IES San Tomé. Os seus 200 alumnos teñen por diante un ambicioso traballo que inclúe intervencións no río Lagares, na costa, plantacións e fomento de condutas ecolóxicas no centro. Traballando tamén en accións directas nos seus ecosistemas máis próximos están este curso o IES Maria Sarmiento -acondicionando e reforestando áreas de esparexemento en Viveiro- ou o IES Lauro Olmo -rexenerando un bosque de ribeira no Barco de Valdeorras-, entre moitos outros centros que actúan por toda a xeografía galega ao amparo de Voz Natura.
No campo das investigacións, cabe destacar ao equipo gañador do premio provincia de Pontevedra do curso pasado, o IES Faro dás Lúas, que este ano analizan e estudan a fondo a vida nos bosques de Vilanova de Arousa.