Décimo quinta edición (2011-2012)

Preto de noventa profesores de toda Galicia participaron este ano nos cursos sobre creación de blogs ambientais impartidos por Voz Natura. Logo de tres anos formando aos docentes e cos alumnos máis involucrados que nunca, a comunidade virtual do programa suma xa 206 cadernos dixitais que se converteron na mellor ferramenta para dar a coñecer a todo o mundo o labor ambiental que desenvolven en Voz Natura.

Os blogs teñen distintos niveis de actualización. Os máis activos poden consultarse a través do apartado Blogs en marcha, que se actualiza periodicamente coas novas incorporacións.

Entre eles, destaca, por exemplo, o do colexio de San Paio de Abaixo (Reboreda-Redondela) que este curso estrea participación en Voz Natura e, ao tempo, pon en marcha un blog que se converte nun dos máis activos de toda a comunidade.

No outro extremo, o dos veteranos, segue despuntando o CPR Cervantes de Lugo con abundante material de apoio relacionado co seu traballo ambiental deste ano sobre os bosques e un completo seguimento de todas as actividades que realizan.

Capítulo aparte merecen os blogs de centros infantís que se converten nunha referencia para que as familias poidan seguir o traballo dos pequenos. Nestes cadernos as imaxes son as protagonistas e, nalgún deles como o da EEI Barrionovo de Arteixo, con coidadas presentacións visuais.

Xunto co portal web do programa, a páxina en Facebook de Voz Natura converteuse no punto de encontro dos blogs e de toda a comunidade ambiental. Ademais, os centros dispoñen dun Blog Mestre con ideas e asesoramento.