Os profesores comprométense cun novo curso Voz Natura
Voz Natura crece de forma ininterrompida desde 1997 e o próximo curso mantense a tendencia: un total de 312 proxectos, doutros tantos centros educativos e asociacións, presentáronse para participar na que será xa a décimo sexta edición.
Ademais, 41 deles achéganse por primeira vez a este programa auspiciado pola Fundación Santiago Rey Fernández-Latorre, co que se confirma o respaldo da comunidade educativa a Voz Natura.
Os principais impulsores do programa son, un curso, máis os docentes. Eles encárganse de deseñar, planificar e coordinar a execución dos traballos ambientais nos que involucran aos alumnos e aos que, en moitas ocasións, dedican o seu tempo libre, fóra do horario lectivo. Por iso, resulta especialmente destacable o compromiso e entrega dos profesores participantes en Voz Natura que, a pesar do complexo panorama de recortes en educación, o incremento de horas lectivas ou a posiblidad do aumento do número de alumnos por aula, reafirman o seu compromiso coa educación ambiental para o próximo curso.
Centros admitidos
Nestes momentos o comité científico de Voz Natura está estudando todos os proxectos presentados para decidir cales se adecuan ás bases do programa e son finalmente admitidos. A decisión farase pública tras a festa fin de curso desta edición que se celebrará o próximo 2 de xuño, no municipio coruñés de Culleredo.