Decimoquinta edición (2011-2012)

Ata 300 escolares de infantil, primaria e secundaria, sete profesores e multitude de colaboradores, incluídas as familias dos alumnos. Con este cadro de persoal á fronte dun completísimo traballo ambiental, a comunidade educativa do colexio Jaime Balmes de Noia fíxose merecedora do premio Galicia 2011-2012 do programa Voz Natura.

O comité científico emitiu o seu ditame logo de visitar en dúas ocasións ao longo de curso cada un dos centros para supervisar os seus traballos e tras revisar as 288 memorias presentadas ao finalizar os proxectos. A súa decisión xustifícase na «diversidade de actuacións ambientais e a súa carga concienciadora; a súa capacidade de utilizar as novas tecnoloxías a favor o medio ambiente e a extraordinaria participación no traballo».

A comunidade educativa do Jaime Balmes desenvolveu un inmenso programa de actividades no recinto escolar e fóra del. Dous das máis relevantes foron a limpeza de praias na súa localidade —no espazo Rede Natura 2000 que abarca desde Taramancos ata Boa Grande— e a reforestación que acometeron en Lesende (Lousame). Tamén realizaron excursións, rutas ambientais e diversas actividades de concienciación —como unha charla con axentes do Seprona—. Os máis pequenos do centro puxeron o seu granito de area inspeccionando a súa contorna e coidando os sementeiros e o horto.

Como recompensa, profesores e alumnos gozarán dunha viaxe de cinco días a Cantabria, con visita aos Picos de Europa, sendeirismo, actividades de aventura e ambientais.

«Aula de medio ambiente». Este centro participa desde a primeira edición de Voz Natura, en 1997. Este curso asinan un gran proxecto multidisciplinar que inclúe traballos no seu horto e no seu invernadoiro, talleres de reciclaxe, saídas para mellorar a súa contorna e concursos ambientais. Ademais, transformaron un monte próximo reforestándoo con diversas especies forestais e froiteiras, mellorando cada ano a súa Área da Natureza do Bañal.

«Xogando a reforestar». En Celeiro (Viveiro) este colexio creou a súa propia aula de natureza con talleres de tratamento de residuos e reciclaxe. Reconstruíron unha biocenosis en forma de charca e realizaron plantacións e reforestacións dentro e fóra das súas intalacións. O comité científico recoñece co premio «a atmosfera de protección ambiental tan positiva que se respira no centro e a participación e compromiso de toda a comunidade escolar».

«Apadriña unha árbore». Por primeira vez en Voz Natura, unha asociación de pais e nais gaña un premio. A ANPA O Recreo, do CEIP Manuel Bermúdez Couso, da Pobra de Trives, co apoio dos profesores do colexio, centrou os seus esforzos na reforestación e prevención de incendios forestais, a limpeza de ríos e a reciclaxe. O comité destaca «a sensibilidade das familias, involucradas cos seus fillos nunha aventura de compromiso ambiental».

«Obradoiro ambiental». No seu segundo ano participando en Voz Natura, os alumnos, profesores, pais e persoal non docente do IES San Tome de Freixeiro, de Vigo, realizaron un gran número de actividades: traballaron no propio centro e na cidade; en bosques, ríos e outros ecosistemas, con valiosas colaboracións como a realizada co Proxecto Ríos, e trataron de concienciar a toda a comunidade cos seus xestos cotiáns a favor da contorna natural.

Os gañadores provinciais pasarán dous días na Estación de Manzaneda.

Nove aulas repartidas en dous concellos conforman o Colexio Rural Agrupado Nosa Señora do Faro que nesta 15ª edición gañou o premio ao Mellor Proxecto Infantil. As escolas premiadas están en Ponteceso (Pazos, Ponteceso, Brántuas, Talo, Xornes, Campase e Tella) e Malpica (Mens e Barizo). Xunto con estas nove unidades traballou tamén a Asociación de Nais e Pais Andares no proxecto titulado «Coidando vos nosos ecosistemas». Máis de 80 alumnos, 17 profesoras e as familias dos nenos involucráronse nun traballo apoiado pola experiencia de catorce anos participando en Voz Natura. Así, realizaron actividades de reciclaxe e reutilización, outras relacionadas coas enerxías renovables e tamén reforestacións. O comité valorou na súa decisión «o uso das novas tecnoloxías para concienciar sobre os problemas ambientais (http://blogs.voznatura.es/cradeponteceso) e propor diversas solucións e a entusiasta colaboración das familias na realización do proxecto». Como recompensa levarán un lote de agasallos, cortesía do Corte Inglés.