Voz Natura cóase nas celebracións do Entroido
Katy, unha activa profesora participante no programa Voz Natura, temía que o pasado venres caesen chuzos de punta. Non só ela, senón tamén todos os profesores e todos os alumnos e todos os pais do CEIP de Palmeira, no municipio coruñés de Ribeira e en abéiraa norte dunha ría de Arousa cada día máis concienciada na loita mundial contra os plásticos innecesarios.
O venres non só non choveu, senón que luciu un sol invernal marabilloso, e profesores, alumnos e pais saíron en desfile polas rúas desa localidade que tan unida estivo no seu tempo á emigración a América cando non comezara o cambio climático.
Agora, ese mesmo cambio climático converteuse no centro do Entroido, cos alumnos denunciando que o reloxo corre tan rápido que hai que paralo facendo moita forza ou o desastre está garantido. Ninguén sobra, e nesa pequena localidade sumáronse coa súa denuncia festiva e o seu traballo diario. O pasado xoves, nas oficinas de Voz Natura e planificando estas liñas, alguén se deu a volta na súa cadeira e suxeriu: «Fala con Katy, de Palmeira, que é un valor seguro neste programa». Acertou.
Como outro valor seguro é Maite, profesora do CEIP Albino Núñez, de Ourense, e que en Voz Natura, como eles din, están « desplastificándose», Maite ata ten un pouco tomada a voz. «Stop cambio climático é o lema baixo o que celebramos o entroido», recentemente acabado o desfile ao que, como no caso de Palmeira, o tempo axudou cunha mañá asollada e de temperaturas plácidas.
E como o Entroido é bo momento para deixar que a orixinalidade soborde, alá saíron ás rúas os 270 alumnos, os profesores e ducias e ducias de familiares dos alumnos. E quedaron asombrados, porque a cousa esixiu o seu traballo, moito traballo. O alumnado ía dividido en tres grupos. O primeiro era o de causas do cambio climático, e ían disfrazados de… coches! O segundo era o de consecuencias (tamén do cambio climático, obviamente), e aí os disfraces eran varios, destacando os de animais en perigo de extinción. E no terceiro, solucións, abundaban os disfraces con papel de xornal chamando á reciclaxe… e a estar ben informados.