Así se seleccionan os proxectos que presentan os centros Voz Natura
«Nin a sortes nin en soidade». A frase, certamente rotunda, pronunciouna fai xa bastantes anos un membro do Comité Científico de Voz Natura. Respondía tan cordial como inapelablemente a un profesor que lle preguntaba como e quen selecciona os centros que participan nese programa de La Voz de Galicia.
Todo está á vista. O como e quen é moi sinxelo: un comité científico de sete persoas analiza, unha por unha, as peticións dos centros, avalíaas, as debate -en ocasións ata o aburrimento, valla a expresión- e toma a decisión pertinente. Non se segue unha orde cronolóxica de chegada nin criterios xeográficos, senón técnicos: o proxecto do centro en cuestión ten que estar ben documentado, demostrar solidez, que se respire o interese por sacalo adiante. Ademais, valórase de maneira especial que sexan proxectos multidisciplinares, viables e de acción directa (ou sexa, que obriguen a saír de entre as paredes da aula).
É máis fácil para un colexio veterano que uno que nunca participou? Pois tampouco, aínda que sempre é certo que se o profesor xa é un «vello coñecido» e Voz Natura foi un éxito nese centro, as portas tenas abertas. «Ao final o proxecto é o que manda, é difícil que rexeitemos algún salvo que sexa algo sen moito peso», di Alejandro Díaz, portavoz do comité científico.E engade rapidamente: «E que cumpran as bases, está claro, como en calquera outro programa». E o certo é que comparando a relación de participantes do curso actual co pasado queda claro que hai varias ducias de recentemente chegados. «Achégannos ideas novas, algunhas delas realmente sorprendentes», engade, antes de lembrar que xa está aberto o prazo para presentar os proxectos para o curso que vén.
Non, os 375 centros que participan neste curso non foron elixidos a sortes e desde logo, non están sós: este é unha viaxe acompañada que se fai xuntos.