Voz Natura fixarase na flora e fauna autóctona durante o próximo curso
Os alumnos de ESO do CPI Poeta Novoneira de Seoane levan varios cursos instalando cámaras de fototrampeo no Courel para estudar e protexer a fauna local. Rexistraron imaxes impresionantes de osos, lobos, martas, gatos monteses...
Os seus compañeiros de Ribeira —dos colexios de Palmeira, Olveira e Artes e a asociación Amicos— uníronse a pasada primavera para erradicar especies invasoras no parque natural de Corrubedo.
Estes son só dous exemplos do que propón o programa ambiental de La Voz de Galicia aos centros que queiran participar no curso 23-24: dar un paso máis no coñecemento e protección da flora e fauna autóctona. E facelo, como sempre, combinando estas actividades con outras, todo o que se lles ocorra para coidar os ecosistemas e concienciar á sociedade desde a escola.
O tema central proposto para o 23-24 ten por obxectivo loitar contra o empobrecemento da biodiversidade, a destrución de hábitats e a substitución de endemismos de vida vexetal e animal por especies alóctonas. Por iso, o comité científico de Voz Natura valorará especialmente as actividades para protexer especies en perigo de extinción, a creación de biorrefugios, o uso de técnicas de fototrampeo, a investigación sobre especies da contorna, o coidado e respecto polos animais, a reforestación con especies autóctonas e a eliminación de invasoras.
Ademais, como en todas as edicións do programa, terán cabida todo tipo de proxectos ambientais enfocados á protección e coidado dos ecosistemas, a promoción dos valores paisaxísticos, os roteiros didácticos pola natureza, a reciclaxe e a separación de residuos, os hortos escolares, as actividades de concienciación e sensibilización así como de acción directa sobre o medio.
O prazo para que os centros educativos e as asociacións presenten os seus proxectos —a través do formulario de inscrición da web— estará aberto entre o 1 de febreiro e o 15 de marzo.
Voz Natura é un programa desenvolvido co apoio da Consellería de Medio Ambiente, a Deputación da Coruña, a Fundación Alcoa, O Corte Inglés, a Fundación Ramón Areces e Inditex.