Participa no noso concurso de fotografía!!
n Voz Natura queremos despedir o curso recompilando as mellores imaxes de natureza e, por iso, pomos en marcha un concurso de fotografía no que vos invitamos a participar. O certame desenvolverase en dúas fases, con dúas temáticas distintas: a primeira, para imaxes sobre a auga e, a segunda, sobre os bosques. Na páxina en Facebook de Voz Natura colgaranse as fotos presentadas e serán os internautas as que decidan, cos seus votos, as gañadoras. Os seus autores recibirán unha tenda de campaña, un saco de durmir e unha mochila de campamento.
Ata o vindeiro luns 23 de maio (8.00 horas) poderanse enviar a voznatura@lavoz.es as imaxes sobre a auga, tema destacado do curso que agora finaliza. No correo débese incluír o título da foto, o nome e apelidos do autor e un teléfono de contacto. O peso das imaxes non debe superar 1 MB. Ese mesmo día publicarase un álbum no Facebook de Voz Natura con todas as imaxes presentadas e poderanse votar durante os seguintes cinco días. A que máis “me gusta” teña o 27 de maio (12.00 horas) será a gañadora.
A segunda fase do concurso tratará sobre os bosques, tema central do próximo curso de Voz Natura. As fotos poderanse enviar entre o 23 de maio (8.00 horas) e o 30 de maio (8.00 horas), coas mesmas características que na primeira fase. Será o día 30 cando se publique o álbum cos traballos presentados e abriranse as votacións ata o 3 de xuño (12.00 horas). A que máis “me gusta” reciba, proclamarase gañadora.
Os autores das imaxes gañadoras recibirán os seus premios na festa fin de curso de Voz Natura que se celebrará o 4 de xuño no parque de Acea de Ama (Culleredo - A Coruña).