Sae o sol e no planeta Terra celébrase algún día internacional de algo. Así que xa non hai xornadas suficientes como para tantos. Pero si hai un deses días que os tres centenares e medio de colexios que participan en Voz Natura celebran ao grande: mañá. O porqué é claro: é o Día Mundial do Patrimonio Natural. Hai que dicir que o obxectivo desa cita é garantir unha protección eficaz e revalorizar o máis activamente ese patrimonio en cada país. Esa é a teoría. A práctica protagonízana sobre os terreo profesores como Javier Pérez Gallego, do CEIP Pedro Crespo, de Xunqueira de Ambía, que con todos os alumnos (97) están comprometidos con dar forma a «un circuíto de orientación permanente do patrimonio natural e cultural a carón do río Arnoia».

Outro río, o pontevedrés Louro, é o que centra os esforzos da Sociedade Galega de Historia Natural. Julio Valeiras, o responsable de Voz Natura nesa veterana e moi activa entidade, destaca que recuperaron unha parcela «que era unha esterqueira», e nese enclave crearon unha charca («E xa está moi avanzada a vexetación») porque aí viven un tipo de tartarugas en perigo de extinción, unhas flores endémicas e multitude de aves acuáticas, e todo iso necesita unha contorna idónea para seguir o seu curso vital. Dentro e fóra do centro afánase a maioría dos case 150 alumnos do CEIP de Olveira, en Ribeira.

Nel, Chus Blanco, a coordinadora de Voz Natura, explica que no exterior dedicáronse a limpar as malas herbas das flores, coidando a contorna inmediata. «Non interior estamos a plantar cousas de outono -explica-, como as cabazas, leitugas, pementos (‘morróns e de Padrón', apunta outra profesora por atrás), xudías…». Os de 2º plantaron landras e castañas, e o interese é ver como van crecendo e, cando sexa posible, trasplantar ao exterior. « Fixémolo cun carballo hai dous anos», engade, cun indisimulado ton de orgullo na voz.

Nunha dimensión distinta, Gabril Dasilva saca mañá a todos os seus alumnos de 3º da ESO nunha saída que se repetirá todos os martes ata febreiro. Cantos alumnos? Tres. « Isto é un centro de montaña, en toda a ESO temos seis», di. O seu obxectivo, sinxelamente impresionante: analizar o nivel de ataque da avespa do castiñeiro en Pedrafita (onde está o centro) e no limítrofe concello leonés de Vega de Valcárce.

E hai que lembrar que Voz Natura é unha iniciativa de La Voz de Galicia e a Fundación Santiago Rey Fernández-Latorre, e que conta co apoio da Consellería de Medio Ambiente, Territorio e Vivenda, a Deputación da Coruña, a Fundación Alcoa, O Corte Inglés e a Fundación Ramón Areces.