En marcha. Así están xa os equipos dos 365 centros que participan este ano en Voz Natura (un programa de La Voz de Galicia e a Fundación Santiago Rey Fernández-Latorre), con traballos que agora mesmo comezan a executarse grazas ao apoio da Consellería de Medio Ambiente, Territorio e Vivenda, a Deputación da Coruña, a Fundación Alcoa, El Corte Inglés e a Fundación Ramón Areces.

E todo apunta a que esta 25 edición de Voz Natura vai ser a máis activa de todas. Non só polo ánimo con que profesores e alumnos chegaron ás aulas tras o moi difícil curso pasado, senón porque o espazo web sobre innovación en educación ambiental (www.voznatura.com/innovación-educativa) empeza a botar fume a estas alturas, cando aínda non acabou setembro.

Ese espazo é nin máis nin menos que unha proposta para levar á aula a innovación no que se refire ao mundo natural, de tal maneira que os docentes poidan atopar experiencias xa probadas, suxerencias, entrevistas e convocatorias de peso. Na Fundación Santiago Rey Fernández-Latorre defíneno como «un espazo en continua ebulición que sirva como ferramenta de apoio para iso, para innovar en educación e no medio ambiente».

Pero hai que botar a vista atrás. Esa nova sección inaugurouse en febreiro do 2021, en plena pandemia e cunha gran vontade de animar e coordinar a un profesorado que estaba a pasar uns momentos moi duros, e aos catro meses de vida recibiu o seu primeiro galardón, unha mención especial na categoría Materiais Didácticos de Ciencias, dentro do certame internacional Ciencia en Acción. Os seus coordinadores, José  Viñas, profesor, e Patricia Barciela, directora da Domus coruñesa, non puideron comezar con mellor pé.

Pero da fama non se vive e menos no interior de colexios e institutos. José  Viñas fala de que este curso incorporáronse moitos profesores ao ensino público, «e iso é unha oportunidade para que se enganchen á innovación educativa», para o que quere «aproveitar a creación de redes, algo que Voz Natura fai moi ben».

Pola súa banda, Patricia Barciela insiste en que hai que ir «enganchando cada vez a máis profesores, non podemos esquecer a todos eses que xa están, que levan 25 anos traballando co programa».
«Desde logo, imos continuar cos plans de innovación educativa, con todos, abrindo o abanico o máis que podamos», remata  Viñas, sen esquecer a importancia da ciencia cidadá. Nesta última incide Patricia Barciela, porque «é algo que está a emerxer a nivel global». O futuro pasa por aí, e aí está Voz Natura, xa desde o comezo deste curso 2021-22 apostando por iso.