Voz Natura e o entroido, unha alianza que funciona
Entroido nalgunhas partes de Galicia, antroido noutras, entroido en todos os colexios e entidades integrados no programa Voz Natura. E hai que matizar: nos centros educativos e fóra deles. Dentro porque se pasaron a semana anterior desenvolvendo mil e unha actividades e fóra porque, a fin de semana ata o mércores de cinza, alumnos, pais e profesores celebran estas festas desfilando cos seus disfraces elaborados con material reciclado ou con mensaxes de concienciación cidadá para protexer o medioambiente. Unha merecida recompensa a semanas de traballo!
No CRA de Vilaboa (Pontevedra) axudan a que reviva, e con forza, a tradición das madamas, e cun toque ecolóxico que esperan que se estenda: concienciaron aos seus alumnos sobre o perigo que significa para o medio ambiente tirar festivamente confeti tradicional, e substituírono por biodegradable que elaboraron nun taller con follas secas e flores da Tulipeira de Figueirido. Puro entroido de Cobres.
Non perderon o tempo, en absoluto, estudantes e profesores do CPR Jaime Balmes, de Noia, co lema «entroido, reciclaxe e concienciación cidadá». Así, percorreron as rúas do centro da histórica vila disfrazados de contedores e de produtos para meter neles, fomentando o consumo sostible e sensibilizando a outros cidadáns da importancia do reutilizar as cousas. Ao mesmo tempo, repartiron marcapáginas con mensaxes do estilo «A reciclaxe evita a talla de árbores», feitos polos alumnos.
En reciclar centráronse tamén no CEIP dás Vendas da Barreira (Riós. Ourense), porque, en palabras da súa directora, Ana María Calvo, «é algo que afecta á toda a comunidade educativa, queremos que vos alumnos medren pensando e sentindo que cada un de nós pode achegar ou seu grao de area». Nese concello ourensán aliáronse co Meco para facer que contribuíse a unha maior concienciación do aproveitamento de recursos da natureza. «E, de luns a mércores, cumprimos as ordes do Meco», di Ana María Calvo. E non o deberon facer nada mal, porque os elixiron para encabezar o gran desfile que tivo lugar o xoves pasado en Verín.
Son moitos os colexios que se merecen figurar aquí como, por exemplo, o CEIP de A Pobra de Brollón que se disfrazaron de animais relacionados co seu horto escolar (abellas, mariquitas, arañas, etc.) ou o CEIP Santa Rita de Galdo-Viveiro que elaboraron os seus disfraces con teas e material reciclado.
Un entroido verde para protexer o planeta!