Os centros Voz Natura bótanse ao monte e abren a tempada de reforestacións
Marzo é, por excelencia, o mes das reforestacións en Voz Natura. En torno ao 21, cando se conmemora o Día da Árbore, os centros educativos e asociacións estrean a primavera con plantacións por todos os recunchos de Galicia. Este curso, a tempada ábrese esta semana, despois de que o vento e a choiva causados pola borrasca Martinho a semana pasada obrigasen a pospoñer varias das actividades programadas.
Unha das accións máis destacadas, que se tivo que aprazar por culpa do mal tempo, levará a cabo nos montes de Baroña. Dous colexios de Porto do Son —o Santa Irene e o Campanario— unirán esforzos para repoboar unha zona con castiñeiros e outras especies autóctonas, coa colaboración do Concello e as comunidades de montes de Noal e Baroña. Serán preto de 200 alumnos e 20 profesores os que se poñerán as botas e botaranse ao monte para dar exemplo a toda a súa comunidade.
Nas catro provincias
Diversos espazos naturais emblemáticos da xeografía galega recibirán a visita das patrullas Voz Natura ao longo dos próximos días. Os axentes do programa ambiental de La Voz de Galicia, desenvolto pola Fundación Santiago Rey Fernández-Latorre, plantarán no monte do Cabo de Fisterra (CPR Nosa Señora do Carmen) ou no monte de Santa Trega (CEIP Manuel Rodríguez Sinde da Guarda), entre outros.
Co patrocinio da Consellería de Medio Ambiente, a Deputación da Coruña, a Fundación Alcoa, El Corte Inglés, a Fundación Ramón Areces e Inditex, colexios e institutos trasladarán as súas accións fose do recinto escolar. Así, os alumnos de 3.º e 4.º do CEIP de Cervo —participante en Naturacción—, co apoio de persoal municipal, trasladaranse nos próximos días aos montes comunais do seu concello para levar a cabo un reforestación que tiveron que cancelar o pasado xoves.
Na provincia de Ourense, a colaboración manda. Realizaranse dúas grandes plantacións: unha en Vilardevós (co CEIP Rodolfo Núñez Rodríguez e o CEIP de Oimbra) e outra en Cualedro (co CEIP de Medeiros e o CEIP Vicente Risco).
Esta pegada Voz Natura é posible grazas á colaboración de concellos, comunidades de montes, axentes forestais, familias e, sobre todo, grazas a moitos docentes, que suman horas á súa xornada para que a acción ambiental forme parte do día a día do alumnado galego.